أولا: القصة
مكتوب انها مقتبسة من نفس الرواية بنفس الاسم وكمان bestseller واضح ان دي موضة السنة دي. بتحكي عن تخيل ليوم نهاية العالم وايه اللي ممكن يحصل فيه للناس اللي مع ربنا واللي مش معاه و ده في إطار قصة بدور حول الطيار ( Rayford) اللي بيقوم بدوره Nicolas Cage وهو رجل مش متدين اوي و منفصل عن زوجته.
بتيجي بنته (Chloe) اللي بتقوم بدورها(Cassi Thomson ) من الجامعة عشان تحتفل بعيد ميلاده ولكن للأسف بيضطر للقيام برحلة مفاجئة . و بيبدأ رحلته و بنته بتقضي يومها مع اخوها و فجأة بتحصل حاجه غريبة في الطيارة و في كل مكان في البلد و هي اختفاء بعض الناس ولا يتبقي منهم الا ملابسهم فقط مما يحدث فوضي شديدة جدا، قلق و ذعر سواء في الطيارة أو في البلد و بتتطور لحوادث و جرائم و سرقات و ارهاب، ما هي كارثة بقي في الظروف دي بنشوف Chloe مش عارفه تتصرف ولا تعمل حاجه بسبب عدم استيعابها لكل اللي بيحصل خصوصا ان اخوها و امها بيختفوا .. زي ما قولت نفس الشئ حصل في الطيارة. و تستمر الأحداث في التشابك لأن Chloe عايزة توصل لأبوها و هو عاوز يوصل الطيارة بسلام مع باقي الركاب اللي اختفي منهم شوية.
شاهد أيضاً: استعراض ومناقشة فيلم Interstellar
قصة غريبة شوية خصوصا ان الناس في الفيلم بدأت تقول ان دي نهاية العالم، و ان الكتاب المقدس بيقول كده و ان الله خد الناس الحلوة و ساب البعدين عنه وده طبعا مش صح. بس أنا عن نفسي من وقت ما بدأت الأحداث تتقلب قعدت نص ساعة مركز و محسيتش بالوقت .
ثانيا: المثلين و شخصياتهم
Nicolas cageطبعا مش من أحسن ادواره. الدور في رأيي مكتوب حلو و في مساحة كبيره لاظهار انفعالات قوية سواء لمحاولة انقاذ الطيارة أو لمحاولة استيعاب الكارثة اللي حصلت. هو عمل دوره بشكل إلي حد ما متوسط بالنسبة للجزئين اللي اتكلمت عليهم . عجبني ادائه في مشاهد صغيرة جدا وكان شكله نضيف اوي في بدلة الطيار.
Cassi Thomson يمكن أول مرة اشوفها و ادائها كان مقبول بشكل عام. اجادت في اداءها في لحظات الذعر و القلق و الخوف.
Chad Michael Murray في دور مراسل الأخبار المشهور اللي بيتعرّف علي Chloe و المتواجد في الطيارة.دوره كان حلو و ادائه برضه مقبول مش مفتعل.
شاهد أيضاً: استعراض ومناقشة فيلم John Wick
ادوار تانية زي زوجة ( Rayford) أو مضيفة الطيارة ، كانوا ادوار عادية جدا
اللي عجبني ادائهم اوي و كسبوا تعاطفي هم ركاب الطائرة . تعاملهم مع الكارثة و مع بعضهم بالرغم من اختلافاتهم كان ممتاز. اصل هي كل الحكاية ايه : مشكلة كبيرة حصلت و تتوقف عليها احياتهم. قوم هات ناس و شوف هتتصرف أزاي . لكن طريقة عكسهم للخوف و القلق كانت ممتازة في رأيي.
ثالثا: السيناريو و الاخراج
السيناريو /عادي جدا و مفيهوش حاجه مميزة تفتكرها. جمل حوارية قصيرة ل Nicolas cage كانت جيدة و مشاهد تصميم Nicolas cageعلي انقاذ الطياره تقريبا اشتغلها بعينيه و السيناريو ما اضافش اوي ليها.
مشهد Chloe مع رجل الدين في الكنيسة كان مشهد في الجون بصراحة.اللي معجبنيش في سياق الفيلم هو بدايته : التمهيد مكانش حلو و علي طول الموضوع دخل في آيات من الانجيل و اراء الناس في الله ، يمكن كان المفروض يجي تدريجيا شوية. إذا السيناريو و الأحداث بالنسبالي استفدت منهم اني شوفت الناس بره بتفكر أزاي و رأيهم في الدين، الله و يوم القيامة, طبعا اللي أنا مختلف معاهم، بس وراني الفيلم فعلا انهم في ظلام ومفيش حاجه تعزيهم.
شاهد أيضاً: استعراض ومناقشة فيلم Gone Girl
بالنسبة للاخراج\ عادي. مميز فقط في مشاهد الفوضي و الشغب اللي كان تفي المدينة. بس مش ابداع يعني . أما بقي مشاهد الطيارة ، فلو قارنت بفيلم flight. فيلم FLIGHT يكسب مفيش كلام. ده بس في المشاهد بتاعت الطيارة أما القصة فمختلفة تماما. فالاخراج كان محتاج اتقان في المشاهد دي. هي كانت عادية مش معجبتنيش بس كانت محتاجة روح الابهار . بس احنا مستنيين ايه من مخرج ده تاني فيلم له من سنة 1993 !!! ده بحسب Wikipedia ده كده بالنسبالة انجاز.
الـsoundtrack ما علمش معايا اوي لكن في أغنيتين واحدة في الثلث الأخير من الفيلم و واحدة في أخر الفيلم. و كانوا حلوين.
التقييم النهائي:
بعد ما خلص الفيلم قولت: It’s ok .. Nicolas cage ممثل قوي لكن في الفترة اللي فاتت مكانش في قمة مستواه. افتكرله اخر الادوار الحلوة اللي عملها كانت في افلام زي : World Trade Center 2006 و Kick-Ass 2010 وادائه الصوتي في فيلم the croods سنة 2013.
الفيلم وضعه حرج في التقييم علي اشهر المواقع:
2% علي Rotten Tomatoes
100\12 علي Metacritic
3.3 علي IMDB
في رأيي الشخصي: Left behind هو أفضل أسوأ افلام Nicolas cage
وعشان انا مبفهمش اوي في موضوع التقييم ده وعشان خاطر Nicolas cage
انا هادّي الفيلم 10\5
انا مستني لNicolas cage عودة قوية قريبا