بعد بالظبط 30 دقيقة مرت من فيلم “وردة”…ماقدرتش أخبي “خيبة” أملي أكتر من كده….و لاقيت نفسي بقول في سري….هو أحنا ليه معندناش أي نوع من أنواع الابتكار و الابداع…ليه مصريين علي التقليد…و فضلت طول الفيلم أتفاجيء بحاجات تثبت لي خيبة الأمل أكتر و أكتر.
الفيلم نسخة ممصرة بالكامل من الفيلم الأجنبي Paranormal Activity. أوجه لتشابه باختصار…كل حاجة !!!
- تكنيك التصوير “Steady Cam”
- القصة
- مواقف المؤثرات البصرية Copy & Paste تحديدا من أول أجزاء الفيلم الأجنبي
- النهاية “بحاذفيرها”
- السيناريو و ده ظاهر في أكتر من مشهد…زي كاميرات التجسس في أرجاء المكان…فكرة تدوين البطل للأحداث بكاميرته الديجيتال الخاصة…حتي فكرة ترقيم أيام أحداث الفيلم عن طريق ال Fade Out منسوخة بنسبة 100% – استخدام فكرة ال FW اللي موجودة في أجهزة الفيديو القديمة علشان يجري تفاصيل كتيرة في الفيديوهات المسجلة بكاميرا المراقبة…
- استخدام جملة أن أحداث الفيلم مستوحاه من قصة حقيقية لاضافة المزيد من التشويق
إقرأ أيضاً: Begin Again .. هل ممكن أغنية تنقذ حياتك ؟
القصة والحوار
طبعا مفيش كلام يتقال عن القصة لأن زي ما قلنا ملطوشة برده مع الأسف…كل اللي اتعمل بس أنه تم تحويل الاحداث من بيت أمريكي لبيت في الأرياف…و دومتم علي كده !!!…مشاكل كتير ظهرت في الحوار لدرجة أنك ساعات تحس أن الممثليين بيتكلموا بس علشان مينفعش يسكتوا…حتي اتقان “اللكنة” الريفية متمش عليه أي مراجعة…فتجد أن الكلام ريفي و شوية قاهري خصوصا من الشخصيات اللي المفروض متربية في القرية و مخرجوش منها…زي الأم و الاخ الصغير حتي “وردة” نفسها اللي المفروض مخرجتش من غرفتها مش من القرية
التمثيل
كل الممثليين تقريبا Miss Cust من وجهة نظري المتواضعة الا بعض الأدوار زي دور الأم…و الشيخ المعالج…حتي شخصية “وردة” الرئيسية كانت صادمة جدا بالنسبة لي
شاهد أيضاً: Big Hero 6 | استعراض ومناقشة بالعربي
الموسيقي
من الأفلام القليلة الي الموسيقي التصويرية فيها أختفيت تماما…و ده كان شيء غريب جدا بالنسبة لي…لأن الموسيقي في النوع ده من الأفلام بتضيف للفكرة و تدخل المشاهد أكتر في Mood الفيلم لكن واضح أن المخرج تعمد ده أو كان ليها وجود غير موظف أو ملحوظ بالمرة لدرجة أن أنا مش فاكره
التصوير
استخدام ال Steady Cam في النص الأول من الفيلم كان فيه Distortion رهيب…تقطيعات سريعة جدا…و للي ميعرفش ال Technic ده في التصوير بيستخدم في مشاهد الأكشن غالبا و في الفيلم ده استخدم علشان يدي احساس ال Digital Cam …اضافة صوت خروشة ميكروفون الكاميرا اضاف Distortion زيادة مالوش أي تبرير بالنسبة لي
إقرأ أيضاً: Left behind .. واحد من الافلام اللي اتعرضت في عام 2014 مش اكتر
الخدع والمؤثرات البصرية
زي ماتكلمت في الأول…كل مشاهد الرعب الموظفة “ملطوشة” بالمسطرة من الفيلم الأجنبي و تحديدا الجزء الأول منه…و لو اتكلمنا عن ال Jump Scares الموجودة و دول يتعدوا علي صوابع اليد الواحدة !!! هنلاقيها تميل للسذاجة خصوصا لو كنت مشاهد مخضرم للنوع ده من الأفلا….كلها كانت جيدة التنفيذ بس زي ما قلت ساذجة…منقدرش نقول انه كان فيه Creepy Moments تذكر.. .أقوي مشاهد ال Effects هو مشهد النهاية..
شاهد أيضاً: John Wick | استعراض ومناقشة بالعربي
الاخراج
نجح “هادي الباجوري” في محاكاة الفيلم الأجنبي بدقة متناهية و بجودة عالية بصراحة…و لكن بدون أي لمسة ابداعية من ناحيته…مع وجود بعض الأخطاء و منها أنه أغلب مشاهد ظهور الجن و اعراضه علي وردة كانت نهار سواء داخلي أو خارجي…و ده طبعا غلط لأنه لو كان وظف المشاهد دي بالليل كانت عملت تأثير أعلي بكتير…حاجة كمان أنه استخدام البطل لل Digital Cam في مشاهد كتير كان محتاج يكون مبرر أكتر من كده فظهر و كأنه مقحم علي الأحداث
** بداية إنذار بحرق الأحداث **
أسوأ مشهد
من وجهة نظري الشخصية…ظهور مشهد المصحف الشريف ممزق و ملقي في حديقة المنزل مكنش له أي لزمة بصراحة و كان سهل جدا استبداله بأي تدعيم تاني لفكرة وجود جن في البيت زي مثلا قطع الكهربا وقت تشغيل القران في الراديو أو حتي اشتعاله أو غيرها من أفكار تانية كان ممكن توصل نفس المعني بدون مساس بحاجات في مصر لسه مش متعوديين عليها… أو مش هنفهمها…لأن سمعت استنكار الناس في السينما بوداني و ده أكد لي أننا لسه قدامنا شوية علشان نقدر نفصل .بالبلدي…لازم نحترم أن مش كل حاجة يا “هادي يا باجوري” بتتقدم برة…نقدر نقدمها في مصر…حتي لو أنت كمخرج مش مقتنع بده
** نهاية إنذار بحرق الأحداث **
شاهد أيضاً: Interstellar | استعراض ومناقشة بالعربي
أفيه الفيلم
اصرار اللامبدع “محمد حفظي” بعد كل ده و بكل بجاحة أنه يكتب أن الفيلم من تأليفه…أعتقد أنه لو كان كتب “تمصير” محمد حفظي كنت هحترمه أكتر!!!
باختصار، فيلم “وردة” تجربة تمصير جيدة… كان ممكن تكون أحسن من كده بكتير.
للتواصل مع الكاتب عبر فيسبوك: أيمن بهاء